躁與化

相片與下文無關。又或者有關。可能，暗瓦底我希望我能像那隻雀仔般自由自在。

我得承認，今天，的確有狂躁的先兆，由1000進入地鐵車廂那刻開始。
我想對身旁那幾位菲藉女子講︰我起身讓座唔係畀你地幾個可以一齊坐，我只係想讓畀妳們掛住爭位而睇唔到既推著輪椅的人。你地一人一把聲吱吱喳喳令我心煩氣躁。
我想對那位旺角上車的女子講︰架車係迫d, 不過妳同妳男人唔一定要廿四小時黏住拖住架麻，唔該唔好迫走我, 我明明企0係一個妳掂唔到我既地方, 點解妳係都要迫向我？妳企定定好唔好？幾廿歲人搭程車都要郁來郁去, 妳個手袋整到我個背脊好多次妳知唔知？
我想對火車上數位唔知咩藉遊客講︰我話之你影相拍video, 唔好影我好唔好？你冇問過我就兜口兜面影埋黎, 知唔知咩叫禮貌？

那股火，在心裡燒著燒著。一直燒到中午。請不要掂到我，我好憎畀人推到我掂到我，即使係個袋掂到我，我都會啤你。是近來開始，養成這種在人堆中自我孤僻的傾向。

今天又有人問我這個問題︰方向好唔好做呀？

每次面對這個問題，我是打從心裡想封口的，奈何這樣做太有型，絕對有違社交場合所需的基本要求。
如果問問題的人，是相熟的朋友或行家，我會答︰幾好，尚待觀察。
如果問問題的人，是半熟行家，我會答︰ok 架，成日唔洗返公司，都幾好丫!
如果問問題的人，是唔熟兼唔醒行家，我真係唔識答。我不想敷衍了事，但如果要認真地回應這個問題，請問你有一句半句鐘的時間嗎？但即使你有，我也沒有。

實情是，到目前為止一切安好，工作愉快，只是仍被在公司電腦打不出「啲」「嘅」等口語字這樣小的事情困擾。適應力強好像是水瓶座的特質，但漸漸懷疑自己是否太「化」，太早「化」，對一切毫無反抗之心。插白鴿黨是永恆定律，李馬丁叫做李漢奸，沒問題丫。

只是，對於我最欣賞的議員劉慧卿，要叫瞓街卿。為了她，我會選擇不提她，唔寫當幫忙。