富貴如浮雲

蒼井優/大浪灣/ 110/ sept 08

三年前，身邊的同事個個炒股，眼看本小的郁 d 又賺幾千，本大的就近乎天天請食飯，行家朋友說單靠份糧真係食粥，要犯賤地做記者又唔想窮到燶，就得靠股市了。那時窮到燶的我心癢癢，開了個股票戶口，狂抽新股，期望以小搏大。

兩年前，股市天天創新高，本小的我亦期望密食當留三番。但人就係愈來愈貪心，亦即係賭博心態，見好唔願收，結果試過蝕返轉頭，仍死守唔放。

一年前，個個政商界人士都話08年係選舉年，北京又搞奧運，股市一定直上。還記得那隻港交所一下子升到二百幾蚊的時候嗎？那時公司中人個個無心工作，人人也在想如果我買左幾多幾多手港交所，單玩即日鮮都發達了！

現在想來，當記者的好處是做了幾年仍然是窮到燶，所以我買唔起港交所中移動，一直只係買下ｄ股仔，賺不到那些大錢，今天蝕的也只是小錢，也算是好彩。（金額是小，但比例仍大．．．．）但亦因為我對前景信心爆棚，去年那個舊的ｍｐｆ戶口是進取到不得了，結果上月收到年結單，狂蝕了２０％，那一刻真的心如刀割。

由細到大，大人總教導你做人要腳踏實地，之不過現今世間上有幾多個可以單靠「腳踏實地」達到自己既夢想？好多人既夢想都只不過係有個屬於自己既住所，安安穩穩，呢個願望一ｄ都唔過份。只係呢個地價樓價異常地高的地方，腳踏實地就等如不理性。

五年一個 recession，在我懂性以來，這個可算是第二個。沙士仍像昨天發生，海嘯又來了，可恨五年過了，戶口沒有多少進帳，想「腳踏實地」買股長揸，也有心無力，看來又要眼巴巴看著匯豐超低價、樓市暴瀉的入市/上樓好時機在眼前溜走。